برنامج المطبخ حلقة اليوم الأحد 14-4-2013 مع الشيف يسرى خميس

استعدي لشم النسيم.. بالفسيخ والسردين المخلل

 

ممكن تقدّمي الفسيخ مع بصل أخضر وخس

باقي أقل من شهر على عيد شم النسيم، علشان كده النهارده جبنا لك طريقة تخليل الفسيخ والسردين في البيت، علشان تحضّريهم من دلوقتي وتبقي ضامنة نضافتهم وسلامة عيلتك..
الفسيخ
المقادير:
2 سمكة كبيرة بوري
كيس ملح
كمون وشطة (اختياري)

الطريقة:
1- هاتي سمك البوري ووقفّيه بحيث تكون الرأس لأسفل والذيل لفوق، علشان ينزّل الدم اللي فيه من الخياشيم، وبعد كده سيبيه ينشف في الشمس لمدة ساعة أو ساعتين، أو ممكن تدخّليه في فرن ساخن لمدة من 2 : 5 دقائق.

2- بعد كده هاتي السمك، واعملي له تدليك خفيف بإيدك، علشان بعد ما السمك يتخلل يكون متجانس مع بعضه.

3- افتحي خياشيم السمكة، وحطّي فيها كمية كبيرة من الملح والشطة والكمون بحيث تملي كل فراغ الخياشيم، وبعد كده حطّي الملح على جسم السمكة من برة وحرّكيه عليه من تحت لفوق.

4- هاتي ورقة بيضة كبيرة وحطّي عليها كمية من الملح، وبعد كده حطّي عليه السمكة، وبعد كده رشّي عليه كمية تانية من الملح، ولفّي عليها الورقة بحيث تغطّيها تماما، وبعد كده لفّيها بحوالي 4 أو 5 ورقات كمان علشان تمنعي الهواء من إنه يوصل للسمك، وبعدين لفّيه في 3 أو 4 أكياس بلاستيك، وكرّري الخطوات دي مع باقي السمك، بس كل واحدة لوحدها، وفي الآخر حطّيه في علبة زجاج أو بلاستيك واقفلي عليه كويس.

5- سيبيه في مكان دافي في المطبخ لمدة 3 أيام وبعد كده افتحي العلبة واقلبي الأكياس اللي فيها الفسيخ على جنب تاني من غير ما تفتحيها، واقفلي عليه العلبة مرة تانية، وتاني يوم اقلبي الفسيخ بنفس الطريقة على جنب مختلف وكرّري نفس الخطوة دي يوميا.

6- بعد 15 يوم تقدري تفتحي على الفسيخ وتنظّفيه من القشور وتفتحيه وتنضفي بطنه، وبعد كده انقعيه في خليط من الخل والليمون علشان تعقّميه من الميكروبات، ولو حسّيتي إن الفسيخ طلع مالح معاكي أوي، ممكن تحطّيه في ميه مغلية لمدة دقيقتين علشان تقلّلي من ملوحته.

السردين بيحتاج من أسبوع لأسبوعين علشان يستوي

السردين المخلل
المقادير
2 كيلو سردين بلدي
كوب زيت نباتي
كيس ملح
شطة

الطريقة:
1- هاتي السردين واشطفيه كده على السريع بالميه بس من غير ما تفتحيه، وبعدين حطّيه في مصفاة لغاية ما ينزّل كل الميه اللي فيه.

2- اخلطي كيس الملح مع الشطة في طبق، وحطّي كمية صغيرة من خليط الملح والشطة في خياشيم السردين.

3- هاتي علبة بلاستيك وافردي فيها 2 أو 3 أكياس بلاستيك، ورصّي طبقة من السردين في قاعدة العلبة بحيث إن كل سردينة تبقى عكس الثانية، وبعد كده رشّي كمية من خليط الملح والشطة وحطّي ملعقة كبيرة زيت، وبعد كده حطّي طبقة تانية من السردين وكرّري نفس الخطوات لغاية ما كمية السردين اللي عندك تخلص.

4- في الآخر حطّي باقي الملح على الوش وضيفي من 2 : 3 ملاعق كبيرة، وبعدين اربطي الكيس كويس أوي، وبعد كده غطّيه بطبقة من الورق الفويل، وبعد كده اقفلي العلبة بالغطاء بتاعها كويس.

5- سيبي السردين لمدة أسبوع أو أسبوعين على حسب حجم السردين، وكل يومين قلّبيه بس من غير ما تفتحي الكيس بإنك تمسكي الكيس وتقلبيه فوق وتحت.

6- بعد ما يتخلل السردين نظفيه وحطيه في علبة وحطي عليه الزيت والليمون والخل وشيليه في الثلاجة لوقت اللزوم.. وبالهنا والشفا.

وبكده تكوني استعديتي لشم النسيم..
وعملتي لعيلتك فسيخ وسردين نظيف ومضمون..

رز بسمتي بالبسلة والجزر

رز بسمتي بالبسلة والجزر على "سفرة دايمة"

ممكن تضيفي الكركم على الرز

النهارده هنعرف مع بعض طريقة عمل رز بسمتي بالبسلة والجزر، وتقدري تقدّميه كطبق جانبي.
الرز البسمتي بالبازلاء والجزر
المقادير:
2 كوب رز بسمتي
¼ كيلو بسلة
¼ كيلو جزر مقطع لقطع صغيرة
½ كوب بصل مقطع لقطع صغيرة
ملعقة كبيرة زيت نباتي
½ ملعقة كبيرة زبدة
مكعب مرقة دجاج
ملح وفلفل أسود
4 كوب ميه

الطريقة:
1- اغسلي الرز وسيبيه على جنب ينشف، وبعدين شوّحي البصل في الزبدة وسيبيه على جنب، وبعد كده حطّي البسلة والجزر في ميه على النار وضيفي عليهم الملح والفلفل الأسود وسيبيهم على النار لحد ما يغلوا.

2- ضيفي عليهم مرقة الدجاج والبصل وسيبيهم على النار لمدة 3 دقائق، وبعد كده ضيفي عليهم الرز وسيبيه يستوي على النار لمدة 15 دقيقة، وبعدين سيبيه يبرد لمدة 5 دقائق، وبعدين قلّبيهم كلهم مع بعض كويس، وقدميه.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،

الجزر مش بس للنظر.. اتعرفي معانا على 8 من فوايده

 

"الجزر بيقوي النظر".. الجملة دي بنسمعها كتير جدا وممكن تكون دي المعلومة الوحيدة اللي نعرفها عن الجزر، لأنه غني بفيتامين A وعلشان كده بناكله.

لكن النهارده هنعرف مع بعض فوائد تانية كتير للجزر وإزاي نحصل على الفايدة الكاملة منه زي الحماية من السرطان، ونضارة البشرة، وتأخير ظهور علامات التقدم في السن.

1- الجزر يقوي النظر
الجزر بيحتوي على مادة البيتاكاروتين واللي بتتحول إلى فيتامين A في الكبد، ثم ينتقل بعدها إلى العين ليعمل بدوره على تحسين عملية الإبصار، ووقاية عدسة العين من الضمور والإعتام.

2- الوقاية من السرطان
أكّدت الدراسات أن الجزر يقي من الإصابة بسرطان الرئة وسرطان الثدي وسرطان القولون لأنه يحتوي على مادتي  Falcarinol و Falcarindiol المضادة للسرطان، وتعتبر مادة Falcarinol بمثابة مبيد طبيعي يفرزه الجزر لحماية جذوره من الإصابة بالفطريات.

3- مكافحة الشيخوخة
مادة البيتاكاروتين الموجودة في الجزر بنسب مرتفعة تعمل أيضا كمضاد للسموم الموجودة في الجسم، وبالتالي فهو يحمي الخلايا من الإصابة بالشيخوخة المبكرة.

4- بشرة صحية من الداخل والخارج
النسبة الكبيرة من فيتامين  Aومضادات الأكسدة الموجودة في الجزر تعمل على حماية البشرة ووقايتها من أضرار أشعة الشمس ومنع ظهور التجاعيد المبكرة وعلامات الشيخوخة وحب الشباب، بالإضافة إلى أن فيتامين A يعمل أيضا على ترطيب الشعر والبشرة، وإبقاء الأظافر قوية.

يمكنك استخدام الجزر في عمل ماسك سحري وغير مكلّف لبشرة نقية وحيوية، وذلك بخلط مقدار من الجزر المبشور مع قليل من العسل الأبيض ووضعهم على الوجه.

5- مطهر طبيعي للجسم
يعتبر الجزر من المطهرات الطبيعية لأن فيتامين A يزيد من قدرة الكبد على التخلص من السموم وتنظيف القولون، كما يسرع عملية طرد النفايات من الجسم، ويعمل أيضا على الوقاية من العدوى لأنه يقوي الجهاز المناعي.

6- الوقاية من أمراض القلب
أثبتت الدراسات أن الأطعمة التي تحتوي على نسبة عالية من الكاروتينات تعمل على الوقاية من الإصابة بأمراض القلب، كما يحتوي الجزر على ألياف قابلة للذوبان تعمل على انخفاض نسبة الكوليسترول في الدم.

7- صحة الأسنان واللثة
الجزر يمنع تلف الأسنان حيث يقوم بتنظيفها بشكل طبيعي أثناء الأكل، فيعمل كبديل لفرشاة الأسنان والمعجون، حيث إنه يزيل بكتيريا الطعام اللي تسبّب التسوس ومشكلات اللثة والأسنان.

8- الوقاية من السكتات الدماغية
أثبتت الدراسات التي أجراها باحثون في جامعة هارفارد، أن الأشخاص الذين يأكلون 6 جزرات في الأسبوع أقل عرضة للسكتات الدماغية من الذين يأكلون كميات أقل.

عجينة الباف باستري على اكلات مصريه

النهارده هنعرف مع بعض طريقة عمل عجينة الباف باستري اللي ممكن تستخدميها كمعجنات بحشوات مختلفة، زي الجبنة والسوسيس واللحمة. 

عجينة الباف باستري

المقادير:

2 ملعقة كبيرة زبدة

ملعقة صغيرة ملح

2½ كوب دقيق

2 كوب ميه

الطريقة:

اخلطي الدقيق مع الملح والزبدة لحد ما يتجانس الخليط، وبعدين ضيفي الميه واستمري بالخلط، بعد كده افردي العجينة بإيديكي، وبعدين غطي العجينة وسيبيها في الثلاجة طول الليل، وممكن بعد كده تعملي بيها معجنات بالجبنة والسوسيس والزعتر واللحمة المفرومة.

خلصت وصفتنا النهارده..
استنونا كل يوم مع وصفات جديدة..
سلام،،

سلطة البطاطس بصوص المايونيز على اكلات مصريه

النهارده هنعمل مع بعض سلطة البطاطس بصوص المايونيز بطريقة سهلة، وممكن تقدميه كطبق جانبي مع وجبة الغداء.

سلطة البطاطس بصوص المايونيز
المقادير:
كيلو بطاطس
½ كوب شبت مقطع لقطع صغيرة
ملح وفلفل أسود
كوب مستردة
4 فص ثوم

مقادير الصوص:
¼ كوب زيت زيتون
ملعقة صغيرة شطة
½ كوب مايونيز
ملح وفلفل أسود
1/3 كوب خل

الطريقة:
1- قشّري البطاطس وقطعيها لأنصاف، وبعد كده حطيها في ميه على النار وضيفي عليها الملح والثوم، وسيبيها تتسلق لمدة من 20-25 دقيقة، وبعدين سيبيها على جنب تبرد.

2- لعمل الصوص: اخلطي المايونيز مع زيت الزيتون والخل والشطة والملح والفلفل الأسود مع بعض لحد ما يتجانس الخليط، وسيبيهم على جنب.

3- قطعي البطاطس لشرائح صغيرة وضيفي عليها الشبت والمستردة والصوص وقلبيهم مع بعض، وبعد كده غطّي السلطة وحطيها في الثلاجة لمدة ساعة، وبعدين طلعيها من الثلاجة ورشي عليها ملح وفلفل أسود، وبعدين قدميها.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،

شوربة اللحمة بالبطاطس على اكلات مصريه

النهارده هنعمل مع بعض شوربة اللحمة بالبطاطس ليكي ولعيلتك، جربيها معانا وقولي لنا رأيك.
شوربة اللحمة بالبطاطس

المقادير:

¼ كيلو لحمة مقطعة لقطع صغيرة
½ كيلو بطاطس
عود كرفس مقطع لقطع صغيرة
ثمرة جزر مقطعة لقطع صغيرة
بصلة مقطعة لقطع صغيرة
3 ملعقة كبيرة زبدة
½ كوب كريمة
4 كوب شوربة
ملح وفلفل أسود
¼ كوب دقيق
2 كوب ميه
3 فص ثوم
شطة

الطريقة:

1-  سيحي الزبدة على النار وضيفي عليها اللحمة والجزر والبصل والكرفس والثوم، وقلّبيهم مع بعض على النار لمدة من 5-6 دقائق، وبعدين ضيفي عليهم الدقيق وقلبيهم مع بعض على النار لمدة 3 دقائق، وبعد كده ضيفي عليهم الشوربة والميه وسيبيهم على النار لمدة 15 دقيقة لحد ما الخليط يغلي.

2- قشّري البطاطس وقطعيها لمكعبات صغيرة، وبعدين انقعيها في ميه ساقعة شوية، وبعدين شيليها من الميه وضيفيها لخليط الشوربة وكمان ضيفي عليهم ملح وسيبيهم على النار لمدة 15 دقيقة.

3- اهرسي الخليط بالشوكة وهو على النار، وبعدين ضيفي عليهم الفلفل الأسود والشطة والملح والكريمة وقلبيهم مع بعض على النار لمدة دقيقتين، وبعد كده قدميها.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،     

فطيرة اللحمة المفرومة على اكلات مصريه

النهارده هنعمل مع بعض فطيرة اللحمة المفرومة بطريقة بسيطة ليكي ولأفراد أسرتك.

فطيرة اللحمة المفرومة
مقادير العجينة:
2½ كوب دقيق
مكعب زبدة كبير مقطع شرائح
½ ملعقة صغيرة ملح
ملعقة كبيرة خل تفاح
7 ملعقة كبيرة ميه

مقادير الحشو:
¼ كيلو لحمة مفرومة معصّجة
كوب بصل أخضر مقطع لقطع صغيرة
¼ كوب جبنة شيدر مبشورة
¾ كوب لبن
كوب كريمة
زيت زيتون
3 بيضة

الطريقة:
1- لعمل العجينة، اخلطي الخل مع الميه وسيبيه على جنب، وبعد كده ضيفي الملح للدقيق، واخلطيه مع الزبدة وضيفي عليهم الميه بالخل، واستمري بالخلط لحد ما تتجانس العجينة، وبعدين افردي العجينة بإيدك، واقسميها نصفين وغلّفيهم بكيس وحطّيهم في الثلاجة لمدة 30 دقيقة.

2- طلّعي العجينة من الثلاجة وافرديها في طبق فرن، ودخّليها فرن ساخن لمدة من 10 : 15 دقيقة، وبعد كده طلّعي العجينة من الفرن وسيبيها على جنب.

3- اخلطي البيض مع الكريمة واللبن والزعتر وسيبيهم على جنب، وبعدين افردي نصف كمية اللحمة على العجينة، وبعدين ضيفي نصف كمية الجبنة.

4- بعد كده ضيفي خليط البيض والكريمة، وبعدين ضيفي باقي كمية اللحمة والجبنة، ودخّلي العجينة مرة تانية في الفرن لمدة من 40 : 45 دقيقة، وبعدين طلّعيها من الفرن وسيبيها تبرد شوية، وبعدين قدّميها.. وبالهنا والشفا.

ملحوظة: ممكن تستخدمي النصف التاني من العجينة  في مرة تانية.

خلصت وصفتنا النهارده..
استنونا كل يوم مع وصفات جديدة..
سلام،،،

بالفيديو.. كيكة التوت على اكلات مصريه

النهارده هنعمل مع بعض كيكة التوت بطريقة سهلة وبسيطة، جرّبيها وقولي لنا رأيك.

كيكة التوت
المقادير:
1½ كوب دقيق
¾ كوب توت
½ كوب زبدة مجمّدة مقطعة لشرائح
¼ ملعقة صغيرة بيكينج بودر
½ ملعقة صغيرة ميه
½ ملعقة صغيرة ملح
½ كوب سكر
صفار بيضة
رشة قرفة

الطريقة:
1- اخلطي الدقيق مع السكر والبيكينج بودر والملح مع بعض كويس، وبعدين ضيفي عليهم القرفة واستمري بالخلط، وبعد كده ضيفي عليهم الزبدة واخلطيهم مع بعض كويس لحد ما يتجانس الخليط.

2- ضيفي على العجينة صفار البيض واخلطيهم مع بعض كويس، وبعد كده ضيفي عليهم الميه واستمري بالخلط لحد ما يتجانس الخليط، وبعدين افردي نصف الخليط في الصينية، وبعدين ضيفي عليها التوت ثم ضيفي باقي الخليط، وبعدين دخلي الصينية فرن ساخن وسيبيها لمدة من 30- 35 دقيقة، وبعدين سيبيها تبرد شوية، وقدميها.. وبالهنا والشفا.

كوسة بالبشاميل على "سفرة دايمة"

النهارده هنعمل مع بعض الكوسة بطريقة مختلفة، وهي كوسة بالبشاميل على طريقة "سفرة دايمة".

كوسة بالبشاميل
المقادير:
كيلو كوسة متوسّطة الحجم
½ كيلو لحمة مفرومة
مكعب مرقة دجاج
2 ملعقة كبيرة زبدة
بصلة مبشورة
ملح وفلفل

مقادير صوص البشاميل
2 ملعقة كبيرة زبدة
2 ملعقة كبيرة دقيق
2 كوب لبن
ملح وفلفل

الطريقة:

1- اغسلي الكوسة كويس وقشّريها وقطّعيها إلى نصفين بالطول، وبعد كده شوّحيها في الزبدة.

2- حطّي البصلة المبشورة في قليل من الزيت لغاية ما يبقى لونها أصفر، وحطّي عليها اللحمة المفرومة، وضيفي ليها الملح والفلفل وقلّبيها على النار لغاية ما تستوي.

3- حضّري صينية وادهنيها بقليل من الزيت، وحطّي فيها نصف كمية الكوسة، وحطّي عليها اللحمة المفرومة وبعد كده رصّي باقي الكوسة.

4- لتحضير البشاميل؛ هاتي حلة وحطّيها على النار وسيّحي فيها السمنة وخلّيها تسخن كويس، ضيفي عليها الدقيق وقلّبيه لحد ما يبقى لونه أصفر، وبعد كده ضيفي اللبن والملح والفلفل مع التقليب جيّدا، لغاية ما يبقى البشاميل تقيل شوية وسيبيه يبرد.

5- صبّي البشاميل على الكوسة وغطّي الصينية بورق السلوفان، ودخّليها الفرن لغاية ما وشها يحمّر.. وبالهنا والشفا.